Гонконг авиакомпаниясына берилип кеткен бала бакча мамлекетке кайтарылды
Бишкек. 17 - октябрь. КирТАГ – Кыргыз-Гонконг авиакомпаниясына 20 жыл мурун берилип кеткен Бишектеги №52 бала бакча мамлекеттин менчигине өттү. Бул тууралуу башкы прокуратура билдирди.
«Аталган имарат 1992-жылы Кыргыз-Гонконг авиакомпаниясы карызынан улам башка акционерлерге берилген. Аларга берилген имарат да бир канча жолу колдон колго сатылып кеткен. 2011-жылы Кытайдын Синьцзян-Уйгур облусундагы Кызыл-Суу автономдук облусунун алдындагы соода-экономикалык башкармалыгына өткөн», - деп маалымдайт генпрокуратура.
Бала бакчанын имаратын менчиктештирүүдө мыйзам бузуу аныкталган. Свердлов райондук прокуратурасынын арызынын Бишкек шаарынын райондор аралык соту канаатандырган.
Аталган имарат соттун чечими менен мамлекетке кайтарылды. Мамлекеттин карамагына өткөн бала бакча 54 млн 519 миң сомго бааланууда.
