Стамбул аэропортунан кыргызстандык контрабандачылар кармалды
Дата: 09:20, 02-12-2019.
Бишкек. 2 - декабрь. КирТАГ – Стамбулдун аэропортунан контрбанда менен айыпталып, издөөдө жүргөн кыргызстандыктар кармалды. Бул тууралуу Түркиянын соода жана өндүрүш министрлиги билдирди.
Маалыматка караганда, 29-ноябрда Стамбул аэропортунан Алматы рейси менен учуп келген 6 кыргызстандык кармалган. Алардын багажынан 7 миң 390 куту электрондук тамеки табылган.
«Бажы кызматы товарларды “контрабанда” деп таап, алардын наркын 27 миң долларга баалады. Кармалган кыргызстандыктарга «Контрабанда» беренеси боюнча айып тагылып, тергөө башталды» - деп айтылат маалыматта.
Түркиянын мыйзамдары боюнча, кыргызстандыктарды 5 жыл түрмө жана ири айып пул күтүүдө. Буга чейин Түркия электрондук тамекилерди өлкөгө киргизүүгө тыюу салган.
